НАТО Украинага ёрдам беришда давом этади
Аммо альянс Россия билан тўғридан-тўғри можарога йўл қўйиш ниятида эмас.
НАТО Украинани қўллаб-қувватлашда давом этади, бироқ алянс Россия билан тўғридан-тўғри можарога йўл қўймасликка ҳаракат қилади. Бу ҳақда НАТО бош котиби Йенс Столтенберг Брюсселда Шимолий Атлантика алянси давлат ва ҳукумат раҳбарларининг учрашуви арафасида бўлиб ўтган матбуот анжуманида маълум қилди.
“Иттифоқчилар эртага қўшимча ёрдам беришга рози бўлишини кутаман. Аммо биз жанговар ҳаракатлар Украина чегарасидан ташқарига чиқмаслиги ва НАТО ва Россия ўртасидаги можарога айланиб қолмаслиги учун жавобгармиз. Бу янада кўпроқ ўлим ва вайронагарчиликка олиб келади", - деди алянс бош котиби.
Шунингдек, у “НАТО иттифоқчилари 2014-йилдан бери ўн минглаб украиналик аскарларни ўқитган ва ҳозир улар олдинги сафда”, деб қўшимча қилди.
НАТО Украинага киберхавфсизлик ва кимёвий ва биологик ҳужумлардан ҳимоя қилиш соҳасида ҳам ёрдам беради.
24 март куни ташкилотнинг Брюсселдаги қароргоҳида Украинадаги вазият ва алянс мудофаа қобилиятини ошириш бўйича НАТОнинг фавқулодда саммити бўлиб ўтади.
