Араб давлатлари Ямандаги операциясини вақтинчалик тўхтатди
30 март куни Ар-Риёдда яманлик сиёсий кучлар ўртасида музокаралар старт олади.
Саудия Арабистони бошчилигидаги араб коалицияси Ямандаги ҳарбий операциясини вақтинча тўхтатади. Бу ҳақда SPA ахборот агентлиги хабар берди.
"Коалиция бирлашган қўмондонлиги чоршанба куни 06.00 дан бошлаб Яман ҳудудидаги барча ҳарбий операцияларни тўхтатишини маълум қилади. Бу Ар-Риёддаги маслаҳатлашувларнинг муваффақиятли ўтказилиши ҳамда муқаддас Рамазон ойи давомида тинчлик учун қулай муҳит яратиш учун амалга оширилмоқда. Биз ўт очишни тўхтатиш режимига амал қиламиз ва унинг сақлаб қолиниши учун барча чораларни кўрамиз", — дейилади коалиция баёнотида.
30 мартдан 7 апрелга қадар Ар-Риёдда Ямандаги низолашаётган томонлар ўртасида музокаралар бўлиб ўтади. У Форс кўрфази араб давлатлари ҳамкорлик кенгаши ташаббуси билан ташкил этилмоқда. Музокараларда 6 муҳим масала муҳокама қилинади.
Яманда 2014 йилдан буён қуролли низо давом этмоқда. 2015 йилда Саудия Арабистони бошчилигида коалиция марказий ҳукумат томонида урушга қўшилди. Ушбу низо йирик гуманитар инқирозга олиб келди. БМТ маълумотларига кўра, 24 миллион яманлик (аҳолининг 80 фоизи) гуманитар ёрдамга муҳтож.
Аввалроқ Яман хусийлари Саудия нефть объектларига ҳужум қилгани тўғрисида хабар берилганди.
