Илон Маск Твиттерга шарт қўйди

 

Америкалик миллиардер Илон Маск Твиттердан компаниянинг сохта аккаунтларни аниқлаш механизмини ошкор қилишни талаб қилди. Тадбиркорнинг айтишича, агар корпорация 100 та аккаунтни танлаб олиш усули ва уларнинг ҳақиқийлиги тасдиқланадиган мезонлар ҳақида гапирса, у ҳолда Твиттерни асл шартлар асосида сотиб олади. 

 

Маск, шунингдек, Твиттер бош директори Параг Агравални ижтимоий тармоқ аудиториясининг неча фоизини сохта аккаунтлар ташкил этиши ҳақидаги оммавий мунозарага чақирди.

 

Аввалроқ тадбиркор Тқиттернинг ботларни бошқариш учун фойдаланадиган ҳар қандай алгоритмлари очиқ бўлиши кераклигини айтган эди. У ижтимоий тармоқ фойдаланувчиларини пулли текшириш ғоясини илгари сурди ва унинг мақсади платформани сохта аккаунтларни яратиш учун жуда қимматга тушириш эканлигини қўшимча қилди.

 

Корпорация Маскнинг 44 миллиард долларлик таклифини 25 апрел куни қабул қилди. Бироқ май ойи ўрталарида тадбиркор ижтимоий тармоқдаги сохта аккаунтлар нисбати билан боғлиқ вазиятга ойдинлик киритмагунича, келишувда бошқа ҳаракат бўлмаслигини айтди.

Делавер суди Тwиттернинг Маскга қарши даъвоси бўйича суд жараёни бошланишини 17 октябрга белгилади. Жараён беш кун ичида якунланиши керак.