Ҳиндистон–Хитой зиддияти: Деҳли тоғли ҳудудларда жанговар тайёргарликни кучайтирмоқда
Ҳиндистон–Тибет чегара полицияси таркибидаги махсус бўлинмалар яқин масофадаги жанглар, тоғли ҳудудларда ҳаракатланиш ва дронлардан фойдаланиш бўйича тайёргарликдан ўтказилмоқда.
Ҳиндистон Хитой билан баҳсли чегара ҳудудларида юзага келиши мумкин бўлган тўқнашувларга тайёргарлик кўриш мақсадида чегара полицияси таркибидаги махсус бўлинмаларни кучайтирмоқда.
Ҳарбий хизматчилар яқин масофадаги жанглар, баланд тоғли ҳудудларда ҳаракатланиш, дронлар ёрдамида кузатув олиб бориш ва маҳаллий тўқнашувларга тезкор жавоб қайтариш бўйича тайёргарликдан ўтмоқда. Бу ҳақда Nikkei Asia хабар берди.
Нашр маълумотига кўра, 2020 йилда Галван водийсида Ҳиндистон ва Хитой ҳарбийлари ўртасида юз берган тўқнашувлардан сўнг Ҳиндистон–Тибет чегара полицияси таркибида “Шауря” номли махсус бўлинмалар ташкил этилган. Ҳозирда ушбу гуруҳларнинг жанговар тайёргарлигига алоҳида эътибор қаратилмоқда. Чегара полицияси раҳбарияти уларнинг фаолиятини ижобий баҳолаган.
Янги бўлинмалар Ҳиндистоннинг Хитой билан баҳсли чегара ҳудудларини қўриқлаш ва эҳтимолий тўқнашувларга тезкор жавоб қайтариш имкониятларини ошириши кутилмоқда.
Ҳиндистон ва Хитой ўртасидаги Ҳимолай тоғлари орқали ўтувчи чегара ҳали тўлиқ келишиб олинмаган. Икки мамлакат ҳудудлари 1962 йилги урушдан кейин белгиланган Амалдаги назорат чизиғи (LAC) орқали ажратилган. Шунга қарамай, томонлар шарқдаги Аруначал-Прадеш ва ғарбдаги Аксайчин ҳудудлари бўйича ҳудудий даъволарини сақлаб қолмоқда.
