Дуровнинг “Apple”дан ҳафсаласи пир бўлди
У компания сабаб Телеграм янги версияларини ишга тушира олмаяпти.
Телеграм асосчиси Павел Дуров “Apple” ҳеч қандай изоҳсиз мессенжернинг янги версиясини чиқаришни икки ҳафтага кечиктираётганини айтди ва компанияларнинг “адолатсиз амалиёти”ни танқид қилди.
“Ҳафсаламизни пир қилган ягона нарса шундаки, биз тез-тез технология монополистларининг мобил иловаларни кўриб чиқишлари туфайли Телеграмнинг янги версияларини чиқара олмай қоламиз. Масалан, сўнгги янгиланишимиз икки ҳафта давомида тиқилиб қолди. “Apple” томонидан бу бўйича ҳеч қандай сабаблар ва изоҳлар келтирилмади”, — деб ёзди Дуров Телеграмдаги каналида.
Тадбиркор дунёнинг энг оммабоп иловалари ўнталигига кирувчи Телеграмга шундай муносабатда бўладиган бўлса, кичикроқ иловалар ишлаб чиқувчилар қандай қийинчиликларни бошдан кечираётганини тасаввур қилишингиз мумкинлигини айтди.
