Ўзбекистоннинг ШҲТдаги ташаббуслари 54 тага етди
Бугунгача уларнинг асосий қисми амалиётга жорий этилган.
Ўзбекистон шу пайтга қадар уч марта ШҲТга раислик қилган. Мана шу даврларда Ўзбекистон 54 та ташаббусни илгари сурди ва уларнинг асосий қисми амалиётга жорий этилди.
Масалан, ШҲТ доирасида минтақавий аксилтеррор тузилмасини ташкил этиш Ўзбекистоннинг таклифи ва бу тузилма Тошкент шаҳрида фаолият олиб бормоқда.
Яна бир муҳим ташаббус – ШҲТга янги аъзоларни қабул қилиш механизмини ишлаб чиқиш бўлган. Шундан сўнг Ҳиндистон ва Покистон ташкилотга аъзо бўлди, Эрон ҳам ШҲТнинг тўлақонли аъзосига айланиш арафасида.
Ҳиндистон ва Покистоннинг аъзолиги ташкилотга Жанубий Осиё эшикларини очган бўлса, Эроннинг қўшилиши Яқин шарқ эшикларини очади.
Ўзбекистоннинг 2017 йилдан кейинги ташаббуслари нафақат хавфсизлик, балки иқтисодий, транспорт-логистика, маданий-гуманитар, туризм соҳаларидаги ҳамкорликни ривожлантиришга хизмат қиляпти.
