Ўзбекистон ташаббуси билан темирйўл администрациялари ўртасидаги ҳамкорлик ривожланмоқда—Рашид Алимов
Тожикистон вакили ШҲТ мамлакатларининг ўзаро транспорт боғлиқлиги қандай ҳал этилаётганини айтди.
ШҲТ Самарқанд саммити арафасида Тожикистон Президенти ҳузуридаги Давлат хизмати Академияси профессори Рашид Алимов эришилган натижалар, мазкур ташкилотнинг бугуни ва келажаги ҳақидаги қатор саволларга жавоб берди.
Шунингдек, ШҲТнинг собиқ Бош котиби ўзаро боғлиқлик муаммосини қандай ҳал қилаётгани ва бу йўлдаги тўсиқлар ҳақида гапириб ўтган.
“Ўзаро боғлиқлик масаласи сўнгги 10-12 йил ичида, айниқса, транспорт соҳасида жуда долзарб бўлиб келган ва шундай бўлиб қолмоқда. Катта ютуқлардан бири сифатида 2014 йилда Душанбеда автомобиль ташишлари учун қулай шароитлар яратиш тўғрисидаги битимнинг қабул қилинишини кўрсатиш мумкин. Бу жуда мураккаб ҳужжат бўлиб, у 8 йил давомида БМТ ЭСКАТОнинг етакчи мутахассисларини жалб қилган ҳолда тайёрланди”, — дейди Алимов.
Ушбу битим ШҲТга аъзо барча давлатлар томонидан 2016 йилда ратификация қилинган ва энг йирик фундаментал халқаро ҳужжатга айланган. Унинг қабул қилиниши олтита яшил йўлакни шакллантиришда амалга оширилган ноёб имкониятларни яратиб берган.
Битимнинг афзаллиги шундаки, у очиқ битим мақомига эга, унга 2018 йилда Беларусь қўшилган, Афғонистон ва Туркманистон эса катта қизиқиш билдирган. Туркманистон келажакда ушбу ҳужжатга қўшилишга қарор қилса ва Эрон яқин кунларда ШҲТнинг тўлақонли аъзосига айланса, форс кўрфазига яшил йўлак очилади. Бундай ҳолда, товарларни барча транспорт воситалари, шу жумладан Евроосиё маконининг исталган нуқтасига — Шанхайдан Форс кўрфазига ёки Болтиқ денгизига темирйўл орқали етказиб бериш мумкин бўлади.
Қайд этилишича, Ўзбекистон ташаббуси билан темирйўл администрациялари ўртасидаги ҳамкорлик ривожланмоқда, халқаро автомобиль ташишлари учун қулай шарт-шароитлар яратиш ишлари давом этмоқда.
“Ўзаро боғлиқлик вазифасини амалга ошириш йўлида тўсиқлар мавжуд. Улар техник ва холис характерга эга. Транспорт соҳасидаги ўзаро ҳамкорлик мақсадида ягона формула ва ягона алгоритмни ишлаб чиқиш учун вақт, ресурслар ва барча давлатларнинг розилиги талаб этилади. Аммо бу муаммоларни бартараф этиш мумкин”, — дейди у.
