Бангкокда юк поезди ва йўловчи автобуси тўқнашувида ўзбекистонликлар жабрланмаган — ТИВ
Ҳодиса оқибатида 8 киши ҳалок бўлиб, 33 киши тиббий ёрдамга мурожаат қилган.
Бангкокда юк поезди ва йўловчи автобуси билан содир бўлган ҳодисада жабрланганлар орасида ўзбекистонликлар йўқ. Бу ҳақда Ўзбекистон ТИВ матбуот котиби хабар берди.
Транспортларнинг тўқнашиб кетиши оқибатида 8 киши ҳалок бўлиб, 33 нафар жабрланган тиббий ёрдамга мурожаат қилган.
Маълум қилинишича, йўл-транспорт ҳодисаси 16 май куни содир бўлган. 17 май ҳолатига кўра, жабрланганларнинг 15 нафари шифохонадан чиқарилган, яна 18 киши шифокорлар назоратида қолмоқда.
Ҳозирча ҳалок бўлганлардан икки нафари Таиланд фуқароси экани аниқланган.
Police General Hospital суд-тиббий экспертиза бўлими маълумотига кўра, ҳодиса оқибатида жабрланганлар орасида Ўзбекистон фуқаролари йўқ.
“Мазкур ҳолат Ўзбекистоннинг Таиланддаги консуллик муассасаси томонидан доимий назоратга олинган. Зарурат туғилганда, фуқароларимиз қуйидаги телефон рақамлари орқали мурожаат қилишлари мумкин”, дейилади хабарда.
Ўзбекистоннинг Бангкокдаги Бош консуллиги:
+66-2 675-3995; +66-2 675-3996
