Россияда мобил интернет тезлиги кескин пасайди
Бунга санкциялар сабаб бўлган.
Россияда тармоқ ускуналарини етказиб бериш тўхтатилиши муносабати билан мобил Интернет учун частоталар тақчиллиги бошланди. Бу унинг тезлигининг аста-секин пасайишига олиб келмоқда, деб ёзади “Известия” нашри.
Россияга нисбатан жорий этилган санкциялар орасида мамлакатга телекоммуникация ускуналарини етказиб беришни тақиқлаш ҳам бор. Агар илгари компаниялар қўшимча база стансияларини ўрнатиш орқали частота тақчиллиги муаммосини ҳал қилган бўлса, ҳозирда бундай имконият йўқ.
Нашр маълумотларига кўра, 2021 йил ноябридан 2022 йил март ўрталаригача Россияда мобил интернетнинг ўртача тезлиги 21,7 Мбит/с дан тахминан 21 Мбит/с гача пасайган. 2022 йил охирига келиб эса у 1 Мбит/с га – 20 Мбит/с гача тушиши мумкин.
