Канада 1,5 миллион муҳожирни мамлакатга таклиф қилмоқда. Бу нега ке

 

Канада иммиграцияга катта пул тикмоқда. Муҳожирларнинг мисли кўрилмаган тўлқини билан Канада ҳукумати ишчи кучи етишмаслигини қоплашга умид қиляпти. Бунга туғилиш даражасининг пастлиги ва аҳолининг қариши асосий сабабдир. Бироқ барча канадаликлар бундай кўп сонли чет элликларни қучоқ очиб кутиб олишга тайёр эмас.

 

Ноябрь ойи бошида Канада федерал ҳукумати улкан режаларни очиқлади: кейинги йил январидан бошлаб ва 2025 йил охиригача мамлакат ҳукумати ҳар йили 500 минг муҳожирни қабул қилишни режалаштирмоқда. Яъни яқин уч йил ичида Канада аҳолиси жами 1,5 миллион кишига кўпайиши мумкин.

 

Аҳоли жон бошига ҳисобланганда, бу Бирлашган Қироллик қабул қилишни режалаштирганидан саккиз баравар ва АҚШ маъмурияти кутаётган кўрсаткичлардан тўрт баравар кўп.

 

Яқинда ўтказилган ижтимоий сўров шуни кўрсатдики, Канада расмийларининг режалари мамлакат аҳолисининг кайфиятини тўлиқ акс эттирмайди, уларнинг аксарияти чет элликларнинг бундай оммавий оқимидан қўрқади.

 

Ўнлаб йиллар давомида Канада ўз аҳолиси ва иқтисодиёти ўсишини сақлаб қолиш учун янги резидентлар оқимини атайлаб рағбатлантирмоқда. Шу билан бирга, муҳожирларга фуқаролик эмас,Канадада доимий яшаш ҳуқуқи берилади.

 

Ўтган йили 405 минг киши Канадада яшаш учун рухсатнома олди – бу мамлакат тарихидаги энг юқори кўрсаткич. Бошқа кўплаб ривожланган мамлакатларда бўлгани каби Канадада ҳам туғилиш даражаси доимий равишда пасайиб бормоқда, айни пайтда аҳолининг ўртача ёши, аксинча, доимий равишда ўсиб бормоқда ва бу Канадани нафақахўрлар мамлакатига айланиши хавфини оширмоқда. 

 

Бу шуни англатадики, агар мамлакат ўз иқтисодиётини ривожлантирмоқчи бўлса, буни муҳожирларсиз амалга ошира олмайди.Канадада ишчи кучининг ўсиши иммиграция ҳисобига содир бўлди.

 

Бугунги кунда Канададаги деярли ҳар тўрт кишидан бири бошқа давлатдан. Бошқа барча G7 давлатларида бу кўрсаткич пастроқ. Маданиятлар аралашишнинг жаҳон маркази ҳисобланган  АҚШни олайлик: у ерда муҳожирлар аҳолининг атиги 14 фоизини ташкил қилади. Британияда ҳам тахминан шундай.

 

Аслида Британия ва Канададаги иммиграция билан боғлиқ вазиятни солиштириш қийин, чунки бу мамлакатлар аҳолисининг зичлигида катта тавофут бор.

 

Буюк Британия аҳоли зичлиги юқори бўлган кичик орол давлат бўлса, Канада майдони катталиги бўйича Россиядан кейин иккинчи ўринда туради ва бу ерда  38 миллион киши яшайди. Яъни, аҳоли ўсиши учун жой ҳали етарли.

 

Муҳожирларни муваффақиятли жалб қилиш учун ҳудуднинг  катталиги ва қулай демографиянинг ўзи етарли эмас. Бунда аҳолининг қўллаб-қувватлаши ҳал қилувчи омил ҳисобланади. Кўпчилик мамлакатлар учун асосий чекловчи фактор бу жамоатчилик фикридир.

 

Канада ўз мақсадига эриша оладими?

 

Мамлакат нафақат иқтисодий тоифадаги муҳожирларни бошқа мамлакатларга қараганда кўпроқ қабул қилади, балки қочқинлар учун дунёдаги энг очиқ давлатлар қаторига киради. 2021 йилда мамлакат расмийлари 20 мингдан ортиқ аризачига бошпана берган.

 

Канада ҳар доим ҳам катта иммиграция режаларини амалга ошира олмаган. Масалан, 2021 йилда ҳукумат 59 мингга яқин қочқинни қабул қилмоқчи эди, лекин уч баравар камроқ  мигрант келган.

 

Иммиграция вазири Шон Фрейзер бу муваффақиятсизликни COVID-19 пандемиясининг оқибатлари билан изоҳлади. Канадада иммиграцияга муносабат минтақаларда фарқ қилади.

 

Мамлакат ҳукумати йилига 500 минггача муҳожирни қабул қилиш режасини эълон қилганида, муҳожирлар оқими учун ўз квоталарини белгилаши мумкин бўлган Квебек автоном провинцияси 50 мингдан ортиқ одамни қабул қилишга розилигини айтди. Яъни, аҳолининг деярли тўртдан бири яшайдиган Квебек режалаштирилган ташриф буюрувчиларнинг атиги 10 фоизини қабул қилишга тайёр.

 

Провинция бош вазири Франсуа Легонинг фикрича, муҳожирларнинг ҳаддан ташқари кўп келиши француз тилида сўзлашувчи минтақа мавқени заифлаштириши мумкин.

 

Мамлакат аҳолисининг 10 фоизи яшайдиган Торонто ва Ванкувер каби йирик шаҳарларда уй-жой билан таъминлаш масаласи жуда qiyin. Шунинг учун улар кўпчиликни қабул қилмайди.

 

Канада Легер институти ва Канадани ўрганиш ассоциацияси томонидан ўтказилган сўровнома натижаларига кўра, респондентларнинг тўртдан уч қисми биринчи навбатда ҳукуматнинг иммиграция режаси уй-жой ва ижтимоий хизматларга таъсир қилишидан хавотирда. Респондентларнинг деярли ярми (49%) йилига 500 000 ташриф буюрувчилар жуда кўп, деб ҳисоблайди, 31% эса  бу режани маъқуллайди.