Макрон АҚШ ва Эронни Ҳормуз бўғозини очишга чақирди
Франция президенти шунингдек, Доналд Трамп ва Масъуд Пезешкианни Исломободда тўхтатилган музокараларни қайта бошлашга ундади.
Эммануэл Макрон АҚШ ва Эрон раҳбарларини Ҳормуз бўғози орқали юк ташиш ҳаракатини тез фурсатда тиклашга чақирди деб хабар беради ТАСС.
Франция президенти Х (собиқ Twitter) даги баёнотида бўғознинг “ҳеч қандай шартларсиз, назорат ва мажбуриятларсиз” қайта очилиши глобал барқарорлик учун муҳим эканини таъкидлаган. Унга кўра, ушбу стратегик йўлакнинг ёпилиши халқаро савдо ва энергетика хавфсизлигига жиддий таҳдид солмоқда.
Шунингдек, Макрон Доналд Трамп ва Масъуд Пезешкианни Исломобод шаҳрида тўхтаб қолган музокараларни қайта тиклашга чақирган. У томонларни “тушунмовчиликларни бартараф этиш ва кескинлашувнинг янги босқичларига йўл қўймаслик” учун мулоқотни давом эттиришга ундаган.
Маълум қилинишича, 17 апрель куни Франция ва Буюк Британия бошқа ҳамкор давлатлар билан биргаликда Ҳормуз бўғози орқали ҳаракатланаётган кемаларни кузатиб бориш бўйича эҳтимолий “соф мудофаа миссияси”ни муҳокама қилиш учун видеоконференция ўтказади. Бироқ бундай ташаббус фақат ҳудуддаги хавфсизлик вазияти имкон берган тақдирда амалга оширилиши мумкин.
Бундан ташқари, Макрон АҚШ ва Эрон ўртасида эришилган келишувларга қатъий риоя этиш зарурлигини таъкидлади ҳамда минтақадаги кескинликни камайтириш мақсадида ушбу сулҳни Ливандаги вазиятга ҳам татбиқ этиш муҳимлигини қайд этди.
