Садир Жапаров аҳоли пунктларига шахслар номини беришни тақиқлади
Қирғизистон президентининг таъкидлашича, бундай масалалар жамиятда бўлиниш ва баҳсларга сабаб бўлмоқда.
Садир Жапаров Қирғизистонда аҳоли пунктларига шахслар номини бериш амалиётини чеклаш бўйича қарор қабул қилинганини маълум қилди.
Бу ҳақда давлат раҳбари Ўш вилоятининг Олой тумани аҳолиси билан учрашув чоғида билдириб ўтган дейди 24.kg. Унга кўра, бундан буён қишлоқлар ва маҳаллий бошқарув ҳудудларига шахслар номини бериш амалиёти қўлланилмайди.
Президент бу қарорни маҳаллий аҳолининг бир қишлоққа Алймбек Датка номини бериш таклифи юзасидан берилган саволга жавобан изоҳлаган. Жапаровнинг таъкидлашича, бундай масалалар жамиятда бўлиниш ва баҳсларга сабаб бўлмоқда.
“Биз бу ҳолатларни аввал ҳам кўп марта бошдан кечирганмиз. Шунинг учун аҳоли пунктлари номлари бўйича тортишувларга йўл қўймаслик зарур,” дея таъкидлаган президент.
Шунингдек, у тарихий шахсларнинг номи аллақачон халқ хотирасида сақланиб қолишини, қишлоққа ном бериш эса унинг ривожланишини белгилаб бермаслигини қайд этган.
Маълумот учун, Қирғизистонда аҳоли пунктларига шахслар номини бериш амалиёти тарихан кенг тарқалган бўлиб, Совет даврида бу давлат мафкурасининг бир қисми сифатида шаклланган. Мустақилликдан сўнг эса тарихий шахслар номини тиклаш ва уларни абадийлаштириш жараёни кучайган.
