Сирдарёда судья ва банк ходими 7500 АҚШ доллар пора билан қўлга тушди
Судья тадбиркор билан боғлиқ фуқаролик ишини унинг фойдасига ҳал қилиб бериш эвазига пул талаб қилган.
Давлат хавфсизлик хизмати томонидан Прокуратура органлари ва Судьялар олий кенгаши билан ҳамкорликда ўтказилган тезкор тадбирда Сирдарё вилоятида коррупцион ҳолат фош этилди. Бу ҳақда ДХХ Zamon.uzga хабар берди.
Тадбир давомида Гулистон шаҳрида фаолият юритувчи иқтисодий ишлар бўйича судлов ҳайъати судьяси ҳамда Agrobank ATB Гулистон филиали мансабдор ходими томонидан содир этилган ноқонуний ҳаракатларга чек қўйилди.
Тергов маълумотларига кўра, судья ўз юритувида бўлган, тадбиркор томонидан қурилган кўп қаватли бино бўйича касация тартибида кўрилаётган ишни унинг фойдасига ҳал қилиш эвазига ўзининг яқин алоқаси бўлган Agrobank мансабдори билан тил бириктириб, ундан 7500 АҚШ доллари талаб қилган.
Келишувга кўра, банк ходими 5500 АҚШ долларини қабул қилиб олган ва суд қарори тадбиркор фойдасига эълон қилинганидан сўнг, 3600 АҚШ долларини судьяга топшираётган вақтида улар тезкор тадбир давомида ушланган.
Ҳозирда мазкур шахсларга нисбатан жиноят иши қўзғатилиб, дастлабки тергов ҳаракатлари олиб борилмоқда.
