Термизда Афғонистон иқтисодиётига мутахассислар тайёрлаш учун таълим кластери ташкил этилади
"Халқаро ҳамжамиятнинг устувор вазифаси Афғонистондаги инсоний ҳалокатнинг олдини олишдан иборат бўлиши керак" — В. Норов.
1 декабрь куни Польшада ўтказилган Европада хавфсизлик ва ҳамкорлик ташкилоти (ЕХҲТ) Ташқи ишлар вазирлари кенгашининг 29-йиғилишида Ўзбекистон Республикаси ТИВ раҳбари Владимир Норов Афғонистон масаласига ҳам тўхталиб ўтди.
“Халқаро ҳамжамиятнинг устувор вазифалари Афғонистондаги инсоний ҳалокатининг олдини олиш, мамлакат иқтисодиётини тиклаш ва минтақавий савдо-иқтисодий алоқаларга интеграция қилиш, бу мамлакатда муҳим инфратузилма ва ижтимоий лойиҳаларни амалга оширишдан иборат бўлиши керак, – деди В. Норов.
Ўзбекистон ТИВ раҳбари йиғилиш иштирокчилари эътиборини Ўзбекистон томонидан Афғонистонни ижтимоий-иқтисодий тиклаш ва гуманитар ёрдам кўрсатиш борасида амалга оширилаётган саъй-ҳаракатларга қаратди. Стратегик муҳим лойиҳа “Термиз – Мозори Шариф – Кобул – Пешовар” темир йўл лойиҳасини амалга оширилиши Марказий ва Жанубий Осиё ўртасидаги ўзаро боғлиқликни мустаҳкамлаш, Афғонистонни иқтисодий ҳамкорликка жалб этиш ва уни бу икки минтақани боғлайдиган кўприкка айлантириш учун катта имкониятлар очади.
Вазир ЕХҲТ ҳамкорларини узоқ қийин вазиятдаги афғон халқига гуманитар ёрдам кўрсатиш учун Термиз шаҳридаги Халқаро транспорт ва логистика хабидан фойдаланишга, шунингдек, Афғонистон иқтисодиёти учун мутахассислар тайёрлаш учун Термиз шаҳрида таълим кластерини ташкил этишни қўллаб-қувватлашга таклиф қилди.
