"Толибон" аёлларга яна чеклов қўйди
БМТ Бош котиби Антониу Гутерриш бундан хавотирдалигини билдирди.
БМТ Бош котиби Антониу Гутерриш Афғонистонда аёлларнинг ноҳукумат ташкилотларда ишлаши тақиқланганидан хавотир билдирди. Бу ҳақда халқаро ташкилот вакили Стефана Дюжаррик баёнотида маълум қилинди, деб хабар беради Анадолу агентлиги.
«Ушбу қарор аёллар ва қизларга ёрдам берадиган кўплаб ташкилотлар фаолиятига зарар етказади. Одамлар ҳаётини сақлаб қолиш учун афғон аёлларига халқаро ҳамжамият билан ҳамкорлик қилишни тақиқлаш афғон халқига кўпроқ азоб-уқубатлар келтиради», — деди С.Дюжаррик.
Эслатиб ўтамиз, "Толибон" ҳокимиятга келганидан кейин афғон аёлларига нисбатан тақиқ кучайган: энди афғон аёллари боғда сайр қила олмайди, университетларда ўқий олмайди.
