Тошкентда электромобилни тезкор қувватлайдиган янги станция ўрнатилди
Қурилма бир вақтнинг ўзида 2 та электромобилни 50-80% зарядлаш учун 25-30 дақиқа сарфлайди.
Энергетика вазирлиги биносида электромобилларни тезкор зарядлаш станцияси ўрнатилди.
Вазирлик ҳузуридаги Қайта тикланувчи энергия манбалари миллий илмий-тадқиқот институти томонидан қуввати 120 кВт бўлган электромобилларни тезкор зарядлаш станцияси ўрнатилди.
Ушбу зарядлаш қурилмасида бир вақтнинг ўзида 2 та электромобилни 50-80% зарядлаш учун 25-30 дақиқа сарфланади. Бу эса, оддий зарядлаш станциялардан 20 баробар тезкордир.
Станция вазирлик биносининг том қисмида ишга туширилган қуёш фотоэлектр станцияси орқали ишлаб чиқарилган электр энергиясидан фойдаланган ҳолда электромобилларни қувватлайди.
Ҳозирда қайта тикланувчи энергия манбалари миллий илмий-тадқиқот институтида қуёш энергиясидан фойдаланган ҳолда электромобилларни юқори тезликда зарядловчи қурилмаларни яратиш ва ривожлантириш лойиҳаси амалга оширилмоқда.
