Энди ҳомиладорлар "медосмотр"дан ўтиши учун ишдан рухсат берилади

 

Ўзбекистонда 30 апрелдан бошлаб Янги Меҳнат кодекси кучга киради. Унда меҳнат муносабатлари, хусусан, аёллар ҳамда оилавий вазифаларни бажариш билан машғул бўлган шахсларга алоҳида қўшимча кафолатлар берилмоқда.

 

Мазкур масала юзасидан ҳуқуқшунос Муҳаммадамин Каримжонов “Дарё”га берган қисқача интервьюсида тушунтириш берди.

 

“Янги меҳнат кодексининг 403-моддасида антенатал парваришлаш учун иш берувчи бўш кунлар бериши шарт, деган қоида киритилмоқда. Бу нима дегани? Бунда аёллар ҳомиланинг ўттизинчи ҳафтасидан бошлаб ҳомиладорлик ва туғруқ таътилига чиқади. Лекин бу даврга қадар, яъни ҳомила ўттиз ҳафтага тўлгунга қадар турли тиббий кўриклардан ўтилади.

Ушбу ҳолатда Янги Меҳнат кодексида иш берувчи аёлга ўртача ойлик иш ҳақини сақлаган ҳолда антенатал парвариш, яъни ўша туғруққача бўш кунлар бериши шартлиги кўрсатиб ўтилмоқда.

Демак аёлларимиз манашу ҳолатда, албатта, ўртача иш ҳақи сақланган ҳолда бўш кун олиб, тегишли тиббий кўриклардан бемалол ўтишлари мумукин бўлади”, — деди Муҳаммадамин Каримжонов.

 

Ҳуқуқшуноснинг алоҳида таъкидлашича, Янги Меҳнат кодексидаги кафолатлар онага, отага, васий ёки ҳомийга ҳам берилиши мумкин.

 

“Амалдаги Меҳнат кодексида 12 ёшга тўлмаган икки ёки ундан ортиқ фарзанди бор оналарга 3 иш куни қўшимча таътил бериларди. Бундан фақат оналар фойдаланиши мумкин эди.

Энди Янги Меҳнат кодексининг 407-моддасига кўра: 12 ёшга тўлмаган икки ёки ундан ортиқ фарзанди, ёки 16 ёшга тўлмаган ногирон фарзанди бор ота-онадан бирига ёки васийсига ҳам таътил берилади.

Бу дегани, оталар ҳам бундан фойдаланиши мумкин. Тасаввур қилинг, ота яхшироқ жойда ишлайди, ойлиги кўпроқ, аёлини эса ойлиги кам. Агар она тўрт календарь кун таътилни олса, табиийки аёлга камроқ таътил пули чиқади. Ота ўша таътилни олса кўпроқ таътил пули чиқади”, — деди ҳуқуқшунос.

 

Муҳаммадамин Каримжоновнинг тушунтиришича қўшимча таътил олиш учун ота ҳам, она ҳам ишлаётган бўлиши керак.

 

“Агар она ишламайдиган, бевосита болани парвариши билан машғул бўлса, унда ота бундан фойдалана олмайди”, — деди у.