Ўзбекистонда хориждан келганлардан қизамиқ юқиш ҳолатлари ошди
Бугунги кунда дунё бўйича қизамиқ билан боғлиқ вазият кескинлашган
Санитария-эпидемиология қўмитаси маълумотларига кўра, Ўзбекистонда жорий йилнинг июль ойи ҳолатига кўра, қизамиқ касаллигига шубҳа қилинган 306 нафар беморнинг қон намуналари вирусологик лабораторияга юборилган.
Шундан 164 та ҳолатда қизамиқ аниқланган.
Қайд этилишича, Ўзбекистонда қизамиқ билан касалланиш ҳолатлари асосан хориждан келган қизамиқ билан касалланганлар билан алоқада бўлган фуқаролар орасида аниқланмоқда.
Ҳозирда Ўзбекистонда қизамиқ бўйича эпидемиологик вазият назорат остида бўлиб, қизамиқ касаллигига шубҳа қилинган шахслар билан алоқада бўлганлар эпидемиологик кўрсатма асосида профилактик эмлаш билан қамраб олинмоқда, дейилади расмий хабарда.
ЖССТ маълумотларига кўра, эмлашдан бош тортганлар ҳисобига, 2023 йилда дунёда ва Европа минтақасида қизамиқ бўйича эпидемиологик вазият кескинлашган.
