Миллий гвардия ходими томонидан зўрланган 13 яшар қиз иши судда кўрилади
Оила таҳририятга мурожаат қилганидан сўнг бу ҳақда барча оммавий ахборот воситаларида эълон қилинган.
Жорий йилнинг баҳор фаслида Тошкент вилоятида 13 ёшли қиз Миллий гвардия ходими томонидан бир неча йил аввал зўрлангани ҳақида хабар берилганди. Ҳозирда мазкур ҳолат бўйича иш судга оширилди. Бу ҳақда “Сукут сақлама” (Nemolchi.uz) лойиҳаси маълум қилди.
Хабарда айтилишича, қизнинг номусига теккан Ш.Шарипов у пайтда тизимда фаолият юритмаган, кейинчалик эса Миллий гвардияга ишга кирган.
“Икки йил давомида иш судгача етиб бормаган. Жиноят иши даъво муддати ўтиб кетгани ва далиллар йўқлиги важи билан ёпиларди. Иш Қибрай туман прокуратураси, Ҳарбий прокуратура, Бош прокуратурага оширилди. Сенаторлар ва Болалар омбудсманига ҳам мурожаат қилганмиз. Ҳаммаси беҳуда”, деган қизнинг оиласи Nemolchi.uz лойиҳасига.
Оила лойиҳа таҳририятига мурожаат қилганидан сўнг бу ҳақда барча оммавий ахборот воситаларида эълон қилинган. Шундан сўнг янги жиноят иши қўзғатилган.
Иш ўта муҳим ишлар бўйича катта терговчи, Тошкент вилояти прокуратураси ўта оғир жиноятлар бўйича бўлим бошлиғи Қосимов Азаматга топширилган. Терговчи доимо жабрланувчининг оиласи билан алоқада бўлган, жиноятчининг айбини исботлаш учун барча гувоҳларни чақирган ва терговга ёрдам бериши мумкин бўлган майда деталларни ҳам инобатга олган.
Қўшимча қилинишича, жорий йилнинг 29 июль куни тергов ҳаракатлари якунланиб, дастлабки суд мажлислари ўтказилган.
“Одил судловдан умид қиламизки, вақт йўқотилганига қарамай, жиноятчи жазоланади. Токи келажакда бундай жиноятлар такрорланмаслиги ва сукут, қўрқитиш ва ёлланма адвокатларнинг кўплиги ниқоби остида зўравонлик жазосиз қолмайди”, дейилади хабарда.
