Европа нега COVID-19 дан ваҳимада?

 

Европа касалликлар назорати ва профилактикаси маркази Европа мамлакатларининг ярмидан кўпида COVID-19 билан касалланганлар сони ошаётганини эълон қилди. Айрим давлатларда шифохонага ётқизилаётганлар сони ҳам ошган.

 

Ёз мавсуми тугаб, шамоллаш мавсуми бошланиши фонида Европа давлатлари ҳукуматлари коронавирусга қарши қайта эмланишни тавсия қилмоқда.

 

Эмлаш кампанияси учун вируснинг Omicron субвариантига қарши вакцина ишлаб чиқарилди. Олимлар вируснинг бу тури қитъада етакчилик қилаётганини айтмоқда.

 

Янги вакцина бепул бўлиб, 65 ёшдан катталар, иммунитети паст ва ҳомиладор аёлларга тавсия қилинмоқда.

 

Роберт Кох номидаги Германия институти эса оғир касалликлар ривожланиши хавфи бўлган одамларга COVID-19'га қарши вакциналарни ҳар йили олишни тавсия қилмоқда. Сентябрь ойида Германия соғлиқни сақлаш вазири Карл Лаутербах ҳам вакцинанинг бустер дозасини олиб намуна кўрсатди.

 

Испания ҳам қишки мавсум учун эмланиш бўйича тавсияларини янгилади. Унга кўра, 60 ёшдан катта, қариялар уйида яшовчилар ёки иммунитети паст одамлар ва ҳомиладор аёллар коронавирус ва гриппга қарши эмланиши тавсия этилган.

 

Нидерландия аҳолининг ҳимояга муҳтож қатламларини эмлашни бошлади. Вакцинани хавф гуруҳига кирувчилар ҳам олиши мумкин.

 

Польша апрель ойиданоқ бустер дозанинг бешинчисини оғир касалликлари бўлган одамлар ва тиббиёт ходимларига юборишни бошлаган.

 

Болгарияда эса омикроннинг ХВВ вариантига қарши эмлаш бошланди.

 

Қишки мавсумда COVID-19 яна диққат марказига чиқишига сабаб - грипп ва шамоллашнинг хам кўпайишидир. Бир вақтда алангаланган учта вирус эса касалхоналар тўлиб кетишига сабаб бўлади.

 

Бу йилдан бошлаб Европа давлатлари коронавирусга тест ижобий натижа берса, мажбурий изоляцияни бекор қилaди. Жумладан, Нидерландия ҳукумати бу қадамни касаллик фақат оз миқдордаги беморларда оғир кечиши билан изоҳлади. Ҳукуматлар изоляцининг ўрнига соғлом ақл билан тафаккур қилган ҳолда уйда қолишни тавсия қилмоқда. Қироллик соғлиқни сақлаш вазири Эрнст Куйперс буни "вирус билан ёнма-ён яшашга кўникиш" деб атамоқда.

 

Германия ва Франция ҳам аҳолига худди шундай тавсия қилган.

 

Италия шу йил августида энг сўнгги карантин чекловларини бекор қилиб, буни вакцинанинг борлиги билан изоҳлади. Шунингдек, мажбурий изоляция ҳам талаб қилинмайдиган бўлди. Мамлакат соғлиқни сақлаш вазири Орацио Скиллачи унинг вазирлиги вазиятни кузатиши ва агар керак бўлса, вирус тарқалишининг олдини олиш чораларини кўришини билдирди.