Миср ҳамжамиятни фаластинликларни ҳимоя қилишга чақирди
Миср чегарасида Гаъзо сектори учун гуманитар йўлак очилган.
Ғазо секторига инсонпарварлик ёрдамлари кела бошлади. Илгари гуманитар ёрдамни бомбардимон туфайли етказиб бўлмасди. Бу ҳақда Миср президенти Қоҳирада ўтаётган Фаластин муаммоси бўйича саммитда айтиб ўтди.
Саммитда 30 дан ортиқ давлат вакиллари иштирок этмоқда. Булар, асосан, давлат раҳбарлари ва ташқи ишлар вазирлари, шунингдек, бир қанча халқаро ва минтақавий ташкилотлардир. Миср президенти ҳамжамиятни фаластинликларни ҳимоя қилишга чақирди. Баҳрайн қироли Фаластин ҳуқуқлари таъминланмай туриб, Яқин Шарқда барқарорлик бўлмайди, деган бўлса, Иордания қироли Ғазо секторидаги урушни зудлик билан тўхтатишга чақирди.
Аввалроқ Ғазо секторига халқаро гуманитар ёрдам юкланган биринчи юк машиналари етиб келгани хабар қилинган эди. 20 та юк машинаси озиқ-овқат, сув ва дори-дармон олиб келган.
Бир кун аввал Миср билан чегарада ушбу автомобиллар ўтиши учун назорат-ўтказиш пункти очилган эди. Оғир юк машиналари таркиби Исроил ҳарбийлари томонидан қурол контрабандасининг олдини олиш учун синчковлик билан текширилди, бироқ тақиқланган ҳеч нарса топилмади. Ғазо секторига 50 тоннага яқин озиқ-овқат келтирилди.
Ғазо сектори ҳозирда Исроил томонидан бутунлай тўсиб қўйилган. Электр ўчирилган, сув йўқ. Минтақа гуманитар фалокат ёқасида. Айни пайтда Миср билан чегарада озиқ-овқат ва барча зарур нарсалар бўлган яна 200 га яқин юк машинаси тўхтаб турибди.
