Ўзбекистон Қаҳрамони Жонсаид Турдиев вафот этди
Президент унинг вафоти муносабати билан ҳамдардлик билдирди.
20 октябрь куни “Олмалиқ кон-металлургия комбинати” «Қолмақир» конида кўп йиллар меҳнат қилган экскаватор машинисти, меҳнат фахрийси, Ўзбекистон Қаҳрамони Жонсаид Турдиев 69 ёшида вафот этди. Президент Шавкат Мирзиёев унинг вафоти муносабати билан ҳамдардлик билдирди.
Жонсаид Турдиев 1954 йил 20 июнь куни Тошкент вилоятининг Бўка туманида туғилган. Ўрта мактабни тугатиб, ҳарбий хизматни ўтагач, Тошкент вилояти, Олмалиқ шаҳридаги 80-автокорхонада ҳайдовчи бўлиб иш бошлаган. 1977 йилдан меҳнат фаолиятини Олмалиқ кон-металлургия комбинати тизимида давом эттириб, қарийб ўттиз йил мобайнида «Қолмақир» конида самарали хизмат қилди, кўплаб шогирдлар тайёрлаб, Ўзбекистон тоғ-кон саноати ривожига катта ҳисса қўшди.
У жамоатчилик ишларида фаол иштирок этиб, Олмалиқ шаҳар «Маърифат» тарғиботчилар жамияти аъзоси, фаол тарғиботчи сифатида ҳудудда ислоҳотларни амалга ошириш, аҳолини ижтимоий ҳимоя қилиш, турли миллат вакиллари ўртасида дўстлик ва ҳамжиҳатликни мустаҳкамлашда жонбозлик кўрсатган.
Жонсаид Турдиевнинг давлат ва халқ олдидаги хизматлари юксак эътироф этилиб, у 1998 йилда “Ўзбекистон Қаҳрамони” олий унвони ҳамда “Олтин юлдуз” медали билан мукофотланган.
“Мамлакатимиз кон-металлургия соҳасининг таниқли вакили, самимий ва камтарин инсон Жонсаид Турдиевнинг хотираси қалбларимизда ҳамиша сақланиб қолади”, — дейилади таъзияда.
