Қозоғистонда ЙТҲда ҳалок бўлган ўзбекистонликларнинг жасадлари Ватанга олиб келинди
Олмаота шаҳридаги Бош консулхонаси Миграция агентлиги билан ҳамкорликда зарур чораларни кўрди.
22 август куни Қозоғистоннинг Қизилўрда вилоятидан ўтувчи Шймкент–Самара автомобиль йўлининг Ақсай ҳудудида Ўзбекистон фуқаролари иштирокида йўл-транспорт ҳодисаси содир бўлган эди.
Ҳодиса оқибатида уч нафар Ўзбекистон фуқароси воқеа жойида ҳалок бўлган. Маҳаллий ҳуқуқни муҳофаза қилувчи идораларнинг дастлабки маълумотларига кўра, ЙТҲ ҳайдовчининг руль бошқарувида ухлаб қолиши оқибатида юк автомобили билан тўқнашиб кетиши сабабли юз берган бўлиши мумкин.
“Дунё” АА хабарига кўра, Ўзбекистоннинг Олмаота шаҳридаги Бош консулхонаси Миграция агентлиги билан ҳамкорликда ҳалок бўлган фуқароларнинг жасадларини Ватанга тезкор қайтариш бўйича зарур чораларни кўрди.
Қозоғистоннинг ваколатли идоралари билан ҳамкорликда зарур ҳужжатлар расмийлаштирилиб, уч нафар марҳумнинг жасадлари доимий яшаш жойи — Тошкент вилоятининг Бекобод шаҳрига етказилди.
