Тошкентдаги айрим ташкилотларда иш вақтини 8:00 дан бошлаш таклиф қилинмоқда

Тошкент шаҳар ҳокимлиги шаҳар ва туман ҳокимликлари, шаҳар бошқармалари ҳамда уларга қарашли бўлинмаларда иш вақтини соат 8:00 дан 17:00 гача белгилашни таклиф қилмоқда.

 

Таклифга кўра, иш кунининг умумий давомийлиги ўзгармайди. Ходимлар ишни бир соат эртароқ бошлайди ва шунга мос равишда бир соат эртароқ якунлайди.

 

Ҳокимлик маълумотига кўра, ҳозирда кўплаб ижтимоий муассасалар, айрим давлат ташкилотлари ҳамда корхона ва ташкилотларда иш куни соат 8:00 да бошланади. Шу сабабли шаҳар ҳокимлиги ва унга қарашли хизматларнинг ҳам фуқароларга шу вақтдан бошлаб хизмат кўрсатишга тайёр бўлиши таклиф қилинмоқда.

 

Қайд этилишича, иш жадвалларини уйғунлаштириш бир нечта идора иштирокини талаб қиладиган масалаларни тезроқ мувофиқлаштиришга ёрдам беради.

 

Шунингдек, Йўл ҳаракатини ташкил этиш маркази томонидан ўтказилган транспорт оқимлари таҳлили ва моделлаштириш натижаларига кўра, ташкилотларда иш бошланиш вақтларини тақсимлаш эрталабки тиғиз пайтларда йўл тармоғига тушадиган юкламани камайтириши мумкин.

 

Янги иш графиги жорий этилган тақдирда, тушлик вақти ҳам унга мос равишда ташкил этилиб, кун давомида транспорт оқимлари ва умумий овқатланиш объектларига тушадиган юкламани бир маромда тақсимлаш кўзда тутилмоқда.

 

Якуний қарор қабул қилинишидан олдин Тошкент аҳолиси ўртасида сўровнома ўтказилмоқда. Таклиф аҳоли томонидан қўллаб-қувватланса, у белгиланган тартибда касаба уюшмалари ташкилотлари билан келишиш учун киритилади.

 

Сўровнома натижалари 28 август куни сарҳисоб қилинади.