Тошкент метросининг ерости бекатларидаги ёпиқ вестибюллар очилади
5 та метро бекатининг иккинчи кириш-чиқиш жойлари бетонлар ва панжаралар билан тўсиб қўйилганди.
Тошкент метрополитенининг ерости бекатларидан 5 тасига бекатнинг фақат битта томонидан кириб-чиқиш мумкин. Бешала ҳолатда ҳам иккинчи вестибюл шу бекатлар фойдаланишга топширилган вақтдан буён ёпиқ қоляпти.
Булар — “Миллий боғ”, “Ғафур Ғулом”, “Ўзбекистон”, “Юнус Ражабий” ва “Машинасозлар” бекатларидир.
Улардаги иккинчи кириш-чиқиш жойлари бетонлар ва панжаралар билан тўсиб қўйилган.
“Тошкент метрополитени”нинг маълум қилишича, бу бекатлардаги иккинчи вестибюллар улар қуриб фойдаланишга топширилганидан буён ёпиқ ҳолатда қолмоқда. Бунга йўловчилар оқимининг жуда камлиги сабаб бўлган.
Маълум бўлишича, ҳозирги кунда Тошкент метрополитени қошида очилган “Тошметротранс” МЧЖ лойиҳа институти томонидан барча ёпиқ вестибюлларни ишга тушириш бўйича лойиҳалар ишлаб чиқилиб, давлат экспертизасига топширилган.
Экспертиза хулосаси олинганидан кейин, босқичма-босқич таъмирлаш ишлари олиб борилиб, барча ёпиқ вестибюллар 2024 йилнинг май ойигача очиб қўйилади.
