Google Исроил ва Ғазода трафик маълумотларини ўчириб қўйди
Бу Исроил ҳарбийларининг талабига биноан амалга оширилган.
Google Исроил ҳарбийлари талабига биноан ўзининг Maps ва Waze иловалари учун Исроил ва Ғазо секторидаги жонли трафик маълумотларини ўчириб қўйди.
“Ўтмишда зиддиятли вазиятларда ва минтақавий ўзгаришларга жавобан қилганимиздек, маҳаллий ҳамжамиятларнинг хавфсизлиги учун йўл шароитлари ва маълумотларни кўриш имкониятини вақтинча ўчириб қўйдик”, дейилади Google баёнотида.
Google, шунингдек, Исроил мудофаа кучлари талабига биноан Исроил ва Ғазо секторидаги оломон ҳақидаги реал вақтдаги маълумотларни ўчириб ташламоқда. Ҳақиқий вақтда йўл ҳаракати маълумотлари Исроил қўшинларининг ҳаракатларини кўрсатиши мумкин.
Google компаниясининг таъкидлашича, Мaps ва Waze реал вақтда трафикни кўрсатмасада, навигация тизимларидан фойдаланадиган ҳайдовчилар реал шароитларга қараб тахминий етиб келиш вақтларини олишда давом этадилар.
Компания ўтган йили Россия ҳужумидан кейин Украинада шунга ўхшаш чора кўрганди.
