Фарғонада психотроп таблетка сотаётган дорихона ходими ушланди
Ҳозирда унга нисбатан жиноий иш очилган.
Самарқанд ва Фарғона вилоятларида кучли таъсир қилувчи дори воситаларини сотаётган шахслар ушланди.
Бош прокуратура ҳузуридаги Департамент ҳамда ДХХнинг Самарқанд вилояти бошқармалари томонидан ИИБ ходимлари билан ҳамкорликда Самарқанд шаҳри, Беруний кўчасида ўтказилган тезкор тадбирда фуқаролар С.Ш. ва И.М. фуқаро Г.К.га 1 000 дона “Зардекс” номли кучли таъсир қилувчи дори воситасини 18 млн сўмга сотган вақтларида ашёвий далиллар билан ушланган.
Шунингдек, Департаментнинг Фурқат туман бўлими томонидан ўтказилган тезкор тадбирда “K.H.” МЧЖ дорихонаси сотувчиси М.М. фуқаро Д.М.га 61 дона “Зардекс” номли кучли таъсир қилувчи дори воситасини сотган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 251-1-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
