Ҳомиладорлик ва касаллик нафақалари “Baraka” ижтимоий картасига ўтказилади
Нафақа олиш учун банкка бориш, алоҳида ҳисоб очиш ёки қўшимча ариза топшириш талаб этилмайди.
Ўзбекистонда давлат ижтимоий суғуртаси доирасидаги айрим нафақаларни тайинлаш ва тўлашнинг янги тартиби жорий этилди. Бу ҳақда Иқтисодиёт ва молия вазирлиги хабар берди.
Янги тартибга кўра, ҳомиладорлик ва туғиш ҳамда вақтинча меҳнатга лаёқатсизлик (касаллик) нафақалари тайинлангач, тегишли маблағлар фуқаронинг “Baraka” ижтимоий картасига тўғридан тўғри ўтказилади.
Агар фуқаронинг “Baraka” ижтимоий картаси мавжуд бўлса, нафақа маблағлари қўшимча ариза ёки мурожаатларсиз автоматик равишда картага ўтказилади. Бунда банкка бориш, алоҳида ҳисоб рақами очиш ёки қўшимча ҳужжатлар тақдим этиш талаб этилмайди.
“Baraka” картаси мавжуд бўлмаган фуқаролар учун эса нафақа тайинлангач, “Baraka” мобил иловаси орқали виртуал ижтимоий карта автоматик равишда очилади. Тайинланган маблағлар ушбу виртуал картага ўтказилади.
Фуқаро “Baraka” мобил иловаси орқали ижтимоий карта ва унга келиб тушган нафақа маблағлари ҳақидаги маълумотларни кузатиб бориши мумкин.
Шунингдек, жисмоний пластик карта зарур бўлган тақдирда, уни мобил илова орқали буюртма қилиш мумкин. Касаллик нафақаси тайинланган фуқароларга “Baraka” ижтимоий картаси бепул расмийлаштирилади.
Янги тартиб нафақа олиш жараёнини соддалаштириш, ортиқча мурожаат ва ҳужжатбозликларнинг олдини олиш ҳамда ижтимоий суғурта хизматларини рақамлаштиришга қаратилган.
Фуқароларга нафақа тайинланганидан сўнг “Baraka” мобил иловасини текшириб, карта ва тўловлар ҳақидаги маълумотларни кузатиб бориш тавсия этилади.
