Тошкентда одамлар лифтда 9-қаватдан тушиб кетди
Ҳолат бўйича расмийлар маълумот берди.
Тошкент шаҳрининг Мирзо Улуғбек туманидаги бинолардан бирида ичида одамлар бўлган лифт 9-қаватдан қулаб тушгани айтилган хабар тарқалди. Ҳолатга туман ҳокимлиги муносабат билдирди.
Аниқланишича, 24 октябрь куни 253-уйнинг 2 йўлагида ўрнатилган лифт қурилмасидан ушбу уйда яшовчи фуқаролар фойдаланиш даврида лифтга белгиланган тартибда техник хизмат кўрсатилмагани сабабли шахта кабинаси эшиклари конактлари бўшаб қолган. Ташқаридан қўл ёрдамида очилиши натижасида лифт шахта эшиги хавфсизлик мосламаси ишга тушган, натижада лифт дарҳол тўхтаб қолган.
"Ўрганиш давомида лифт тушиб кетмагани, аксинча тегишли хавфсизлик қурилмаси ишга тушиб дарҳол тўхтагани аниқланди. Ҳозирда махсус ташкилот томонидан барча камчиликлар бартараф этилмоқда. Лифт такроран синовдан ўтказилмоқда. Содир бўлган ҳолат бўйича жабрланганлар мавжуд эмас", дейилади хабарда.
