Тошкентда тирбандликларга сабаб бўлаётган таъмирлаш ишлари қачон тугаши айтилди
Шаҳар ҳокимлиги бу бўйича маълумот берди.
Тошкентнинг марказида тирбандликларга сабаб бўлаётган Нукус ва Бобур кўчаларидаги таъмирлаш ишлари 2−3 ноябрь кунлари тугатилади. Бу ҳақда шаҳар ҳокимлиги маълум қилди.
Қайд этилишича, ишлар доирасида асфальт қопламасини янги технологиялар асосида янгилаш, янги йўл усти белгиларини чизиш, ҳудудга қўшимча дарахт ва буталар экилиши кўзда тутилган.
Хабарда амалга оширилаётган кенг кўламли йўл таъмирлаш ишлари аҳоли норозилигига, тирбандликларга сабаб бўлгани айтилган. Шу билан бирга, ёғингарчиликлар сабабли ҳамда кундузги тирбандликларни бироз камайтириш мақсадида ишлар асосан тунги соатларда амалга оширилмоқда.
Эслатиб ўтамиз, ҳафта бошида пойтахтдаги марказий кўчаларда катта тирбандликлар ҳосил бўлган эди. Куннинг тиғиз вақтида “Яндекс харита” тирбандликнинг максимал даражасини кўрсатди.
Хусусан, Алишер Навоий, Лабзак, Сағбон, Сақичмон, Меҳржон, Кичик ҳалқа йўли, 8 март, Шота Руставели, Бобур, Ойбек, Арнасой, Истиқбол, Муқимий-Нукус ҳамда Нурафшон айланма кўчалари орқали ҳаракатланувчи 70 дан ортиқ автобус йўналишларида куннинг тиғиз пайтида қатнов вақти ҳамда оралиқ интервал вақтларига риоя этиш имкони бўлмаган.
