ҲАМАС Россияни энг яқин дўсти деб атади
Гуруҳ гаровга олинган россияликларни озод қилади.
ҲАМАС гуруҳи Россия билан "яқин дўстлик"лари туфайли барча россиялик гаровга олинганларни озод қилишини айтди.
Россия ТИВ маълумотларига кўра, ҲАМАС томонидан гаровга олинганлар орасида саккиз нафар россиялик бўлиши мумкин. Гап икки фуқароликка эга бўлган шахслар ҳақида кетмоқда. ҲАМАС вакиллари уларни қидириб, қўйиб юборишларини айтишган. Гуруҳ етакчиси Абу Марзук айни дамда Москвада бўлиб, Россия Ташқи ишлар вазирлиги унга саккиз кишидан иборат рўйхатни берган.
“Биз бу рўйхатга жуда эҳтиёт бўламиз ва уни диққат билан кўриб чиқамиз, чунки биз Россияни ўзимизнинг энг яқин дўстимиз деб биламиз”, деди ҲАМАС вакили.
Эслатиб ўтамиз, 26 октябрь куни Россия ҲАМАС билан музокараларни бошлаган дунёдаги биринчи давлат бўлди. Ўз навбатида Исроил ТИВ бу ташрифни “номақбул қадам” деб атади ва Москвани ҲАМАС делегациясини зудлик билан чиқариб юборишга чақирди. Кремль бунга жавобан барча томонлар билан алоқаларни давом эттириш зарур деб ҳисоблашини билдирди.
