Битмай тўкилаётган бинолар: Тошкент вилоятидаги 150 та объектда ишлар сифатсиз бажарилган
Бундан ташқари, 106 та объектда 4,8 миллиард сўмлик қўшиб ёзиш ҳолатлари фош этилган.
Тошкент вилояти прокуратураси органлари ҳузурида тузилган ҳудудий штаблар томонидан қурилиш ишлари сифати ва ҳажмларининг ҳаққонийлиги ўрганилиб, 150 та объектда сифатсиз бажарилган 10,6 миллиард сўмлик ишлар аниқланган. Бундан ташқари, 106 та объектда 4,8 миллиард сўмлик қўшиб ёзиш ҳолатлари фош этилган.
Бу ҳақда Сенатнинг Суд-ҳуқуқ масалалари ва коррупцияга қарши курашиш қўмитаси ҳамда Сенатнинг прокуратура органлари фаолияти устидан назорат қилувчи комиссияси йиғилишида маълум қилинди.
Назорат тадбирлари давомида прокуратура органлари томонидан 21,9 миллиард сўмлик 19 та жиноят иши қўзғатилиб, 14,4 миллиард сўм миқдоридаги зарар қопланган.
Вилоятдаги ҳар бир объектнинг лойиҳа-смета ҳужжати қайта ўрганилиши натижасида 994 та лойиҳадан 216,8 миллиард сўм миқдоридаги маблағ бюджетдан ортиқча харажат қилинишининг олди олинган.
Аввалроқ Олмалиқда зилзила талабларига жавоб бермайдиган «дом» қурилиши тўхтатилганди. Шунингдек, бир муддат олдин Чирчиқ шаҳридаги «Янги Ўзбекистон» массивида қуриб топширилганига кўп бўлмаган кўп қаватли уйнинг бир томонга қийшайиб, «ёнбошлаб» қолгани кузатилган, қурилиш вазирлиги ўн кун муддатда муаммо бартараф этилишини ваъда қилган эди.
