Сизнинг шижоатингиз дунёни янада яхшилаши шубҳасиз — Зироат Мирзиёева
Ўзбекистон биринчи хоними Тошкентда ўтган форумда ёш экофаолларга мурожаат қилиб, уларнинг барқарор муҳит учун курашдаги етакчилигини эътироф этди.
9 ноябрь куни Тошкент шаҳрида Бутунжаҳон болалар куни ҳамда БМТнинг Иқлим ўзгариши бўйича 2023 йилги конференцияси муносабати билан “Болалар ва ёшлар ҳаракатда — Марказий Осиёда иқлим ўзгариши” халқаро форуми бўлиб ўтди.
Форум очилишида “Замин” фонди Васийлик кенгаши раиси Зироат Мирзиёева ёш экофаолларга мурожаат қилиб, болаларни иқлим кун тартибига жалб қилиш бўйича минтақавий стратегиялар имзоланишини маълум қилди:
“Форумнинг бош иштирокчилари — сизлар. Бугун бу ерда сизларнинг тоза, соғлом ва барқарор муҳит учун курашдаги етакчилигингизни эътироф этиш мақсадида йиғилдик. Қўшниларимиз билан биргаликда Самарқанд экологик оромгоҳи якунлари бўйича ишлаб чиқилган Барқарор ривожланиш маданиятини илгари суриш ҳамда ёшлар ва болаларни иқлим кун тартибига жалб қилиш бўйича минтақавий стратегиянинг имзоланиши янги келажак сари ташланган муҳим қадам бўлади”.
Ўзбекистон Биринчи Хоними, шунингдек, ёшлардаги бугунги шижоат ва ғайрат дунёни яхшилашга ёрдам беришини таъкидлаб ўтди.
“Мамлакатларимизнинг қадрли ёшлари ва ўсмирларига мурожаат қилиб айтмоқчиманки, сизнинг шижоатингиз, қатъиятингиз, янгича тафаккур ва ёндашувларингиз дунёни янада яхшилашга ёрдам бериши шубҳасиз. Сизнинг овозингиз етиб бориши ва ҳисобга олиниши учун бор куч ва саъй-ҳаракатимизни ишга соламиз”, — дейди Зироат Мирзиёева.
Форумда иштирок этган Шаҳноза Мирзиёева ҳам иқлим ўзгаришининг салбий оқибатларига қарши курашишда болалар ва ёшларнинг роли ортиб бораётганини алоҳида қайд этди.
“Ёшликдан экологик таълим ва тарбия бериш, экологик маданиятни шакллантириш муҳимлиги масаласи шу даражада кўтарилганидан хурсандман. Биринчи марта экологик кўнгиллилик ва иқлим ўзгариши масалалари бўйича сиёсат ва дастурларни ишлаб чиқишга ёшларни жалб қилиш ҳақидаги ғоялар юқори майдонлардан айтилди.
Ишончим комилки, саъй-ҳаракатларни бирлаштириш болалар ва ёшларни барқарор ривожланишни таъминлашдаги келажакдаги ролига тайёрлашга ёрдам беради”, — дея фикр билдирган Шаҳноза Мирзиёева.
