"Мамлакатимизда ҳеч қандай чегара билмайдиган билимли авлод етишиб чиқади"
Саида Мирзиёева хорижий давлатлардан таклиф этилган педагоглар билан учрашди.
Ўзбекистон Президенти ёрдамчиси Саида Мирзиёева хорижий давлатлардан таклиф этилган педагоглар билан учрашди. Бу ҳақда у ўзининг расмий телеграм-каналида маълум қилди.
"Илмли, ўзига ишонган, муносиб авлодни тарбиялашни мақсад қилган эканмиз, бизга иккита нарса: она тилимизга муҳаббат ва хорижий тилларни пухта ўрганиш керак.
Чет тилини билиш – дунё сарҳадлари, глобал ахборот эшикларини очиш, янги билимларни эгаллаш калитидир.
Бугун хорижий мамлакатлардан таклиф этилган педагоглар билан учрашиб, ҳамкорлик бўйича йўл харитасини ишлаб чиқдик. Бу инглиз, немис, француз ва бошқа тилларни ўргатувчи беш юздан зиёд малакали ўқитувчилар демакдир.
Болаларимиз энг яхши устозлардан сабоқ олиш, ўқитувчиларимиз зарур маҳорат дарсларида ўз билимини ошириш имконига эга бўладилар, мамлакатимизда эса ҳеч қандай чегара билмайдиган билимли авлод етишиб чиқади", - дейди Мирзиёева.
