Метронинг ер усти линиялари остидаги бинолар ижарага берилади
Мазкур ҳудудлардаги қарийб 50 минг квадрат метр майдондан савдо ва маиший хизмат кўрсатиш фаолиятини амалга ошириш учун фойдаланиш мумкин.
Тошкент шаҳар ҳокимлиги метрополитеннинг ер усти линиялари остидаги тижорат биноларини ижарага бермоқчи. Бу ҳақда ҳокимлик матбуот хизмати хабар берди.
Унга кўра, мазкур линияларга туташ ҳудудларда савдо ва маиший хизмат кўрсатиш фаолиятини амалга ошириш мақсадида бинолар яратишни назарда тутувчи лойиҳа ишлаб чиқилди.
Ер усти метро линиялари остидаги фойдаланилмаётган ерларнинг умумий майдони 100 минг квадрат метрни ташкил этади. Шундан камида 50%и тадбиркорлар учун қўшимча даромад нуқтасига айланиши ва ҳудудлардан фойдаланиш самарадорлигини оширишга хизмат қилиши мумкин.
Мазкур биноларни сотиб олиш ёки ижарага олиш нархи турар-жой мажмуаларининг биринчи қаватларидаги нотураржой объектларига нисбатан “анча ҳамёнбоп” бўлади. Бу ерда дўкон, қаҳвахона ва ўйин майдончалари ташкил этиш мумкин.
2022 йилнинг ўрталарида синов тарзида 2-метро бекати (ҳозирги «Яшнобод») яқинида тижорат бинолари очилди. Шундан кейин, 3 ва 4-станциялар («Тузел» — «Олмос») оралиғида бу каби биноларни қуришга қарор қилинди.
Лойиҳани икки босқичда амалга ошириш режалаштирилган бўлиб, биринчи босқичда «Роҳат» айланма йўлигача, иккинчи босқичда эса ундан «Қўйлиқ» бозоригача бўлган ҳудудда объектлар ташкил этилади. Жараённи тезроқ якунлаш мақсадида шаҳар ва туман ҳокимликлари кучлари жалб қилинган.
Пойтахт ҳокимлигининг Инвестиция бошқармаси мазкур манзиллардаги биноларни ижарага олиш имкониятини тақдим этмоқда. Бу бўйича 71 210 02 50 рақамига мурожаат қилиш мумкин.
2021 йилнинг октябрида қабул қилинган президент қарори билан ер ости ва ер усти метро бекатларида савдо ва хизмат кўрсатиш майдончаларини ташкил этиб, тадбиркорларга аукцион асосида ижарага бериш белгиланганди.
Жорий йилнинг февраль ойида ер усти метро йўналиши эстакадаси остидаги ҳудудларда жами 2700 ўринли автотураргоҳлар ташкил этилиши ҳақида маълум қилинди.
