Фарғонада Lacetti йўл четидаги устун ва дарахтга урилиб, ағдарилди
Ҳайдовчига воқеа жойида тиббий ёрдам кўрсатилган.
2026 йил 22 август куни соат 16:40 лар чамаси Фарғона шаҳрининг Қувасой кўчасида йўл-транспорт ҳодисаси содир бўлди.
Фарғона ЙҲХБ маълум қилишича, 2002 йилда туғилган Р. Ж. бошқарувидаги Lacetti автомобили ҳаракатланиш вақтида бошқарувни йўқотиб, йўл четидаги кўча ёритиш устуни ва дарахтга урилган. Тўқнашув оқибатида автомобиль ағдарилиб кетган.
Ҳодиса натижасида ҳайдовчига воқеа жойининг ўзида тез тиббий ёрдам ходимлари томонидан биринчи тиббий ёрдам кўрсатилган. Шундан сўнг унинг уйига кетишига рухсат берилган.
Ҳозирда мазкур ҳолат юзасидан Фарғона шаҳар ИИБ ЙҲХБ томонидан терговга қадар текширув ҳаракатлари олиб борилмоқда.
