Фарғонада 2 та «заправка» газдан узиб қўйилди
АГТКШлар фаолиятида аҳоли ҳаётига хавф туғилиши билан боғлиқ бўлган қўпол қоидабузарликлар аниқланган.
Фарғона вилоятида хавфсизлик чоралари кўрилмаган 2 та АГТКШ газ таъминотидан ажратилди, дея хабар бермоқда Энергетика вазирлиги.
«Ўзенергоинспекция» Фарғона вилояти ҳудудий бошқармаси томонидан Фарғона туманида жойлашган “I.G.S.” МЧЖ ҳамда Фарғона шаҳридаги “F.C.B.” МЧЖга қарашли автомобилларга газ тўлдириш компрессор шохобчаларида ўрнатилган технология жараёнларининг ва технологик асбоб-ускуналарининг амалдаги меъёр ва қоидаларга мувофиқлиги, табиий газни қабул қилиб олиш, сақлаш, тарқатилиши ҳолатлари юзасидан ўрганиш ўтказилган.
Ўрганиш жараёнида АГТКШлар фаолиятида аҳоли ҳаёти ва соғлиғига хавф туғилиши билан боғлиқ бўлган қўпол қоидабузарликлар аниқланган.
Ушбу ҳолат юзасидан мутасаддиларга камчиликларни бартараф этиш бўйича кўрсатмалар берилди ҳамда мазкур АГТКШлар юқоридаги камчиликлар бартараф этилгунга қадар (10 кун муддатгача) табиий газ таъминотидан ажратилди.
