Қаршида тирик қизалоқ ўликлар рўйхатига тушиб қолди
Адлиянинг вилоятдаги масъуллари айбни ФҲДЁ ходимларидан қидирмоқда.
Қашқадарё вилоятининг Ғузор туманида яшовчи Аслиддин Муҳаммадиев ва Сожида Исматовалар оиласида 2022 йилнинг 24 июнь куни уч нафар эгизак дунёга келди. Қарши шаҳридаги роддомда туғилган чақалоқларнинг бири — Фотимахон исмли қизалоқ бўлиб, у туғилганидан уч кун ўтгач, вафот этди. Зуҳрахон исмли эгизакларнинг бири тирик бўлсада, ФҲДЁ ходимлари айби билан ўликлар рўйхатидан жой олди.
Мурожаатчининг айтишича, шу воқеа сабаб Зуҳрахон Фаҳриддинованинг туғилганлиги ҳақидаги гувоҳномаси яроқсиз қоғозга айланган.
Ана шу иш бўйича 2022 йилнинг август ойидан ҳозирги кунгача сарсон-саргардончилик бўлмоқда, — дейди эгизакларнинг бобоси Фахриддин ака.
Фахриддин аканинг маълумот беришича, Зуҳрахоннинг вафот этганлар рўйхатида тургани уларга 2022 йилнинг август ойида маълум бўлган.
Болалар пули учун ҳужжат тайёрлаймиз деб борганда ўғлим билиб қоляптида. Бу бола ўлди турибдику дейишганда, чопа-чоп бўлиб қолди. Мурожаат қилмаган жойимиз ҳам қолмади, учрашмаган ташкилотимиз ҳам қолмади, — дейди бобо.
Фаҳриддин аканинг қўшимча қилишича, унинг вилоят прокуратурасига қилинган такрорий мурожаатларидан сўнг прокуратура Қарши шаҳар ФҲДЁ мудираси ишини ўргана бошлаган. Аммо кўп ўтмай, воқеа яна бости-бости қилинган.
Вилоят прокуратураси буларнинг устидан жиноий иш қўзғади. Лекин на бизни чақиришди, на улар билан юзлаштирилдик. Ҳеч ким сўрамади. Кейин билсак ими-жимида раҳбари қолиб, камбағал инспектор қизчага нисбатан чора кўришган экан, — дейди эгизакларнинг бобоси.
Қашқадарё вилоят Адлия бошқармаси ахборот хизмати раҳбари Шоҳида Шоимованинг «Дарё»га билдиришича, мазкур воқеа сабаб 2 нафар ФҲДЁ ходимига ҳайфсан берилган.
Ғузор туманида яшовчи фуқаро C.Исматованинг уч нафар эгизак фарзандлари туғилган бўлиб, иккинчи фарзанди З.Ф. ва учинчи фарзанди М.З. нинг туғилиши қайд этилган ва биринчи фарзанди Ф.Ф. вафот этган ҳамда унинг туғилиши қайд этилмаган. Биринчи фарзанднинг ўлимини қайд этишда техник хатолик сабабли ахборот тизимида иккинчи фарзанд З.Ф.нинг ЖШШИР тортилганлиги сабабли унга нисбатан “вафот этган” деган маълумот шаклланган. Мазкур ҳолат юзасидан бошқарма томонидан ўрганиш ўтказилиб, жорий йилнинг ноябрь ойида биринчи фарзанд Ф.Ф.нинг туғилиши ва ўлими қайд этилган. Ахборот тизимида иккинчи фарзанд З.Ф. нинг вафот этганлиги билан боғлиқ маълумотларга тузатиш киритилган, — деди.
Мурожаатчининг қўшимча қилишича, у набирасига нисбатан қўлланилган қўпол хатолик баратаф этилганини 2023 йилнинг 5 декабрь куни билган. Ва шу куни югур-югурдан, сарсонгарчиликдан тўхтаган.
