Тошкентда аёл 5 кунлик чақалоғини пулламоқчи бўлди
Суд унга нисбатан 4 йил қамоқ жазоси тайинлаган.
Тошкентда 5 кунлик чақалоғини 9 минг долларга сотмоқчи бўлган она ва унга ҳамроҳлик қилган аёл 4 йилга қамалди. Бу ҳақда ўз манбаларига таяниб, “Bugun.uz” нашри хабар берди.
Аёл болани катта қилишга имконияти бўлмаслигини ҳамда эрининг бола билан умуман иши йўқлиги айтиб, танишига болани сотишини маълум қилган. М.М. онаси билан бирга чақалоқни сотиб оладиган “клиент” топган.
Шу йилнинг 31 июль куни аёл ва унга шериклик қилган М.М. Чилонзор метро бекати яқинида чақалоқни сотаётган вақтда қўлга олинади.
Суд аёлларни одам савдоси билан шуғулланганликда айбли деб топиб, уларга нисбатан 4 йил муддатга озодликдан маҳрум қилиш жазосини тайинлаган. Чақалоқ эса болалар уйига топширилган.
