Чўлларни ўзлаштирган деҳқондан уста-наққошгача — фидойи юртдошлар мукофотланди
Сурхондарёлик меҳнат фахрийси Абдусаттор Қурбоновнинг деҳқончиликни ривожлантириш ва чўлларни ўзлаштиришдаги меҳнати алоҳида эътироф этилди.
Мустақилликнинг 35 йиллиги муносабати билан давлат мукофотлари билан тақдирланган юртдошлар орасида турли соҳа ва йўналишларда кўп йиллар давомида самарали меҳнат қилган фидойи инсонлар ҳам бор.
Сурхондарёлик меҳнат фахрийси Абдусаттор Қурбоновнинг чўлларни ўзлаштириш ва деҳқончиликни ривожлантиришга қўшган ҳиссаси алоҳида эътироф этилди.
Бекобод металлургия комбинатида узоқ йиллардан буён пўлат эритувчи бўлиб фаолият юритаётган Ғуломжон Туронов “Хизмат кўрсатган саноат ходими” фахрий унвони билан тақдирланди. Бу эътироф металлургия соҳасида меҳнат қилаётган кўплаб мутахассисларнинг фидокорона меҳнатига берилган юксак баҳо бўлди.
Шунингдек, пахтачилик ва ғаллачиликда юқори натижаларга эришиб, ўзига хос меҳнат мактабини яратган наманганлик Илҳом Зиёвуддинов, ипак қуртини турли мавсумларда парваришлаб, юқори ҳосил олаётган бухоролик пиллакор Жамила Худойбердиева, чорвачиликка илғор технологияларни жорий этаётган қорақалпоғистонлик Эсенбай Айтимуратов ҳамда сув йўқотишларини камайтиришга муносиб ҳисса қўшаётган самарқандлик ирригатор Асланқул Каримқуловнинг хизматлари муносиб баҳоланди.
Ўзбекистондаги Ислом цивилизацияси маркази ҳамда Самарқанддаги Имом Бухорий мажмуасини безатишда меҳнат қилган уста-наққош Сатторхўжа Тўхтахўжаевга “Хизмат кўрсатган қурувчи” фахрий унвони берилди.
