Хоразмда фермерларнинг ери олиб қўйилаётгани айтилди
Ҳолат юзасидан прокуратура расмий изоҳ берди.
Ижтимоий тармоқларда Хоразм вилояти Гурлан туманида 40 дан ортиқ фермер хўжаликларининг ер майдонларини олиб қўйиш бўйича Гурлан тумани прокуратураси томонидан судга даъво аризаси киритилаётгани ҳақида хабарлар тарқалмоқда.
Аниқланишича, айрим фермер хўжаликларига ер майдони танловга қўйиш билан боғлиқ ҳужжатлар ўрганилганида, танлов ўтказиладиган санаси кўрсатилган ҳолда қарор қабул қилинмаганлиги, оммавий ахборот воситаларида эълон қилинмаганлиги ҳамда қишлоқ хўжалигига мўлжалланган ер участкалари танлов ўтказилмасдан қонунга зид равишда ажратиб берилганлиги ва бошқа қатор қонун бузилиши ҳолатларига йўл қўйилган.
Шунга кўра, шоличилик ва бошқа йўналишларда фаолият юритиб келаётган фермер хўжаликларига ер майдони ажратиш бўйича Гурлани тумани ҳокимининг 2019-2021 йилардаги қабул қилинган қарорларини ҳақиқий эмас деб топиш ҳақида Урганч туманлараро маъмурий судига ариза киритилган ва ҳозирда аризалар судда кўрилмоқда.
Бундан ташқари, қайд этилган ҳолатлар бўйича фермер хўжаликлари ва МЧЖларга ер майдонлари ажратилишида қонун бузилиши ҳолатларига йўл қўйилганлиги аниқланиб, мазкур ҳолатлар юзасидан Гурлан тумани прокуратураси томонидан 25.12.2023 йилда туман ҳокимлиги мансабдор шахслари ва бошқаларга нисбатан ЖКнинг 205, 207-моддалари билан жиноят иши қўзғатилган ҳамда ҳозирда дастлабки тергов ҳаракатлари олиб борилмоқда.
