“Ҳеч бир шахс ҳужжатсиз қолмайди” ҳуқуқий акциясига старт берилди

 

Адлия вазирлиги ахборот хизмати 2024 йилнинг 20 январидан 20 мартига қадар ҳуқуқий акция ўтказилишини маълум қилди. Ҳуқуқий акция доирасида қуйидаги шахсларга ёрдам берилади:

 

• Туғилиши қайд этилмаганлиги оқибатида шахсини тасдиқловчи ҳужжатларга эга бўлмаган шахслар;

• Яқин қариндошининг ўлими қайд этилмаган шахслар;

• Туғилганлиги ёки яқин қариндошининг ўлими ҳақидаги тиббий маълумотномага эга бўлмаганлиги сабабли юридик фактни белгилаш юзасидан судларга мурожаат қилиши лозим бўлган шахслар;

• тадбиркорлик субъектларини давлат рўйхатдан ўтказишда ёки қайта рўйхатдан ўтказишда муаммоларга дуч келаётган шахслар;

• кўчмас мулкларини давлат рўйхатидан ўтказишда қийинчиликларга дуч келаётган шахслар.

 

Мазкур ҳуқуқий акция доирасида, жумладан:

• қайд этилмаган туғилганлик ва ўлим ҳолатлари республика миқёсида хатловдан ўтказилади;

• фуқароларнинг ушбу турдаги мурожаатлари жойлардаги туман (шаҳар) адлия бўлимларида ташкил этилган махсус штаблар ёки "1148" қисқа рақамли ишонч телефони орқали тезкорлик билан қабул қилинади;

• сайёр қабуллар ташкил этилади.

 

Натижасига кўра, мазкур шахсларнинг:

• туғилганлиги қайд этилиб, тегишли ҳужжатлар расмийлаштирилади;

• яқин қариндошларининг ўлими қайд этилиб, гувоҳнома (маълумотнома)лар берилади;

• туғилиш ёки ўлим ҳақидаги фактларни белгилаш юзасидан судларга аризалар киритилади ва суд ҳужжати асосида туғилиш (ўлим) қайд этиб берилади;

• тадбиркорлик субъектлари давлат рўйхатидан ўтказишда ва қайта рўйхатдан ўтказишда кўмаклашилади;

• кўчмас мулкларини давлат рўйхатидан ўтказишда қийинчиликларга дуч келаётган шахсларга ваколатли органлар билан биргаликда амалий ёрдам кўрсатилади.