ЎзА биноси ЮНEСКО Бутунжаҳон меросининг дастлабки рўйхатига киритилади
Бу бўйича ариза тайёрлангани маълум қилинди.
Ижтимоий тармоқда «Шарқ» нашриёт-матбаа ижодий уйининг бино ва иншоотлари маданий мерос объектлари рўйхатидан чиқарилгани, шу боис ўзининг аввалги қиёфасини сақлаб қолмаслиги ҳақида хабарлар тарқалди. Ҳолат юзасидан маданий мерос агентлиги изоҳ берди.
Қайд этилишича, мажмуа 1914–1983 йиллар мобайнида бунёд этилган 14 та бино ва иншоотдан иборатдир.
2023 йилнинг 14 октябрида Ишчи гуруҳ мазкур объектларда тарихий ва маданий экспертизани ўтказди.
Гуруҳ таркиби Маданий мерос агентлиги вакиллари, агентлик ҳузуридаги Илмий эксперт кенгаши аъзолари, Давлат активларини бошқариш агентлиги ҳамда “Шарқ нашриёти матбаа корхонаси” акциядорлик жамияти ходимларидан иборат эди.
Экспертиза натижаларига кўра, ишчи гуруҳ томонидан бино ва иншоотларнинг аксарияти тўлиқ реконструкцияни тақозо этувчи авария ҳолати, аянчли аҳволда экани тўғрисида тегишли хулосалар қилинди. Шунингдек, тарихий ва маданий аҳамиятга молик бинолар аниқланди.
Шу билан бирга, Давлат активларини бошқариш агентлигига мулк мажмуасининг реализация қилинишида “ЎзА биноси” (литер 0002) маъмурий биносининг тарихий меъморий қиёфасини сақлаб қолиш зарурлиги, келгусида эса қурилиш, таъмирлаш ва реконструкция ишларини Маданий мерос агентлиги билан келишилган ҳолда амалга ошириш вазифаси юклатилди.
Шунингдек, Маданий мерос агентлиги Тошкент шаҳридаги модернизм иншоотлари, шу жумладан, ЎзА биносини ЮНEСКО Бутунжаҳон меросининг дастлабки рўйхатига киритиш учун аризани тайёрлаган.
