Тадбиркор ва талаба фуқароларнинг 100 млн сўмга яқин пулини ўзлаштирди
Ҳолат Фарғонада содир бўлган.
Фарғонада тадбиркор ва Турин политехника университети талабаси сохта илова яратиб, фуқароларнинг 100 млн сўмга яқин пулини ўзлаштирди. Улар гўё фуқароларнинг пластик картасидаги пулни биржада криптовалютага алмаштирган ҳолда талон-торож қилган.
Фарғонада сохта илова яратиб, фуқароларнинг 100 миллион сўмга яқин пулини ўзлаштирганларга суд ҳукми ўқилди. Маълум бўлишича, Тошкент шаҳрида яшовчи тадбиркор Ш.Ш. ҳамда Турин политехника университети талабаси A.Ю. ҳам ахборот тизими орқали одамларни чув тушириш режасини тузган.
Улар интернет ижтимоий тармоғидан фойдаланиб, "Агробанк мобиле" зарарли иловасини яратган. Мазкур илова орқали фуқароларнинг пластик картасидан эркин фойдаланиш имкониятига эга бўлган. Дастур ёрдамида фуқаро A.Н.ning пластик картасидаги 47 миллион 235 минг сўм миқдоридаги пул маблағини биржада криптовалютага алмаштирган ҳолда талон-торож қилган.
Бундан ташқари, фуқаро O.Ж.ning картасидаги 45 миллион 225 минг сўм сўм миқдоридаги пул маблағларини ҳам криптовалютага алмаштирган ҳолда ўзлаштириб олган. Фарғона вилоят ИИБ киберхавфсизлик бўлими ходимлари томонидан мазкур ҳолатлар бўйича тезкор техник тадбирлар ўтказилиб, уларнинг ҳаракатларига аниқлик киритилди. Судланувчиларга суд ҳукми билан 5 йил муддатга озодликдан маҳрум этиш жазоси тайинланди.
