Тўйида Путин рақсга тушган Австрия ТИВ собиқ раҳбари Россияга кўчиб ўтди
Карин Кнайсл Россияни эркин давлат деб билади ва у ерда қолиб яшаш учун мамлакат шарқида уй қуриш ниятида. У фуқаролигини ўзгартирмайди.
Австрия собиқ ташқи ишлар вазири Карин Кнайсл Россия Федерациясига бутунлай кўчиб ўтганини маълум қилди.
"Мен шаҳарда яшайдиганлардан эмасман", — деди у.
Кнайсл фуқаролигини ўзгартириш ниятида эмас
Австрия ташқи ишлар вазирлигининг собиқ раҳбари фуқаролик берадиган ҳуқуқ ва мажбуриятлар фақат битта давлат билан боғлиқ бўлиши керак, деб ҳисоблаб, Россия паспортини олишни режалаштирмаётганини айтди.
"Фуқароликни шунчаки ўзгартириб бўлмайди. Агар шундай қилсам, битта фуқароликни танлаш керак бўлади. Мен жуда консервативман, лекин бир вақтнинг ўзида иккита паспортга эга бўлиш кўпхотинлиликда яшаш ва икки киши билан турмуш қуришга ўхшайди", — дея унинг сўзларидан иқтибос келтиради ТАСС.
Агентликнинг аниқлик киритишича, ўтган ёзда Кнайсл россиялик бўлиш учун рус тилини тўғри ўрганиши кераклигини айтган. Унинг сўзларига кўра, биринчи навбатда "Уруш ва тинчлик"ни тугатиши керак, Достоевскийни ва Чеховнинг камида иккита асарини ўқиш керак, кейин бу ҳақда суҳбатни бошлаш мумкин бўлади". Кнайсл сўзларига кўра, рус тилини ўрганяпти, аммо унда гапиришга ўзида ҳали ишонч ҳис қилмаяпти.
Собиқ вазир ҳозирча ижарада
2023 йил август ойида Карин Кнайсл Рязан вилояти Касимовский тумани Петрушово қишлоғида уйни ижарага олди, дея хабар беради "Вид сбоку" маҳаллий онлайн газетаси. Нашрнинг аниқлик киритишича, у илгари бир муддат Қуйи Австриядаги Зайберсдорф шаҳрида яшаб, кичик фермани бошқарган.
"Мен эски ҳаётимни тарк этишимга, ҳаммасини бошидан бошлашга мажбур бўлдим, 60 ёшда бу осон эмас", — деб қўшимча қилди австриялик собиқ сиёсатчи.
Американинг The Washington Post газетаси 2022 йил июль ойида мақола чоп этиб, унда Австрия собиқ ташқи ишлар вазири таҳдидлар туфайли ўз фуқаролиги давлатини тарк этгани ҳақида хабар берган эди. Ўша куни Кнайслнинг ўзи Х ижтимоий тармоғидаги шарҳларидан бирида "доимий ҳужумлар" туфайли 2020 йил сентябрь ойида Австрияни тарк этганини тушунтирди.
2022 йил май ойининг охирида Кнайсл "Роснефт" директорлар кенгашидаги лавозимидан бош тортгани маълум бўлди. У Россия давлат концернида бир йилга яқин лавозимда ишлаган.
Эслатиб ўтамиз, 2018 йил август ойида Кнайслнинг тўйида Россия президенти Владимир Путин иштирок этиб, у билан рақсга тушганди. Ўшанда у оммавий ахборот воситаларига ҳукуматдаги ҳамкасбларини ва ўша пайтда Австрияга ташриф буюрган Путинни тадбирга тасодифан таклиф қилганини айтган эди.
