Россиядаги теракт бўйича гумонланувчилар суд залида — фото
Улардан бирининг кўзи юмуқ, яна бирининг қулоғи кесилган, бошқаларининг юз ва кўзлари кўкарган.
24 март куни Москванинг Басман судида терговнинг "Крокус Сити Ҳолл"даги концерт залида 22 март куни содир этилган теракт иши бўйича тўрт фигурантни қамоққа олиш бўйича сўрови кўриб чиқилди. ФХХ гумонланувчилар 23 март куни Брянск областида ушланганини маълум қилган: улар машинада Россия-Украина чегараси томон ҳаракатлангани айтилган. Шундан кейин z-каналларда тўрт гумондордан икки нафари Ражабализода Саидакрами Муродали ва Шамсиддин Фаридуни сўроқ вақтида қийноққа солингани акс этган фото ва видеолар тарқалди. Пропагандачи Маргарита Симонян "гуруҳ раҳбари" деб атаган Далержон Мирзоев ҳамда Ражабализода Саидакрами Муродали аввалроқ тергов изоляторига юборилганди. Қуйида суд залидан асосий кадрлар келтирилади.
Далержон Мирзоев Басман судида мажлис залига олиб кирилмоқда. 32 ёшли Далержон Мирзоев — Тожикистон фуқароси, тўрт нафар вояга етмаган фарзанди бор. Тергов маълумотига кўра, унинг Новосибирскдаги вақтинча туриш муддати ўтиб кетганди. У айбига тўлиқ иқрор бўлган.
Ражабализода Саидакрами Муродали залга олиб кирилмоқда. Кучишлатар тузилмалар ходимлари айнан унинг қулоғини кесиб, оғзига солиб қўйишганди.
Ражабализода Саидакрами Муродали.
Теракт содир этишда айбланаётганларнинг учинчиси — Шамсидин Фаридуни. Z-каналлар уни ток билан қийнашаётгани акс этган фотони намойиш этган.
Тўртинчи айбланувчи — Муҳаммадсобир Файзовни суд залига кресло-замбилда олиб келишган. У атрофдаги воқеаларга ҳеч қандай реакция кўрсатмаган.
