Samsung смартфонлар бозорида Appleʼни ортда қолдирди
Мутахассислар сўнгги уч ойлик сотув натижаларини эълон қилди.
Apple смартфонлар бозоридаги етакчиликни Samsungʼга бой берди, деб хабар бермоқда Reuters нашри.
Унинг маълумотларига кўра, 2024 йилнинг дастлабки уч ойида iPhone сотуви ўтган йилнинг шу даврига нисбатан 9,6 фоизга камайди. Компания 50,1 миллион дона смартфон сотган ва унинг бозордаги улуши 17,3 фоизни ташкил қилган.
Samsung компаниясининг шу даврдаги сотуви 60,1 миллион донани ташкил этиб, 0,7 фоизга камайган ва бозор улуши 20,8 фоизни ташкил этган. Компаниянинг муваффақияти 2024 йил бошида флагман Galaxy S24 моделининг чиқарилиши билан боғлиқ.
Эслатиб ўтамиз, 2023 йилнинг январь-март ойларида Samsungʼнинг улуши 19,4 фоизни, Appleʼнинг улуши 20,1 фоизни ташкил этди.
