Тошкентда Labo темир устунга урилиб, аварияга учради
Ҳодиса оқибатида 43 ёшли эркак вафот этган.
Маълум бўлишича, ЙТҲ тонги соат 05:00 ларда Янгиҳаёт туманида содир бўлган. Ўрганиш ишлари давомида ҳайдовчи руль бошқарувини йўқотганлиги сабабли темир устунга урилганлиги аниқланди.
Маълумотларга кўра, ҳайдовчи 1993 йилда, йўловчи эса 1981 йилда туғилган. Воқеа жойига тиббиёт ходимлари етиб бориб, жароҳатланган шахсларга ёрдам кўрсатган.
“Жорий йилнинг 10 август санасида Янгиҳаёт тумани тез тиббий ёрдам бўлимига автоҳалокат бўйича чақириш тушди. Ҳодимларимиз тезкорлик билан воқеа жойига етиб борди. Икки киши тан жароҳати олган экан. Йўловчи ҳаёт учун хавфли бўлган тан жароҳатлари олганлиги учун, ундан биологик ўлим қайд этилди. Ҳайдовчига биринчи ёрдам кўрсатилган”, — деди шифокор.
Ҳозирда ҳолат юзасидан суриштирув ишлари олиб борилмоқда.
