Инстаграмда “dislike” функцияси пайдо бўлиши мумкин
Ҳозирда у синовдан ўтказилмоқда.
Бу функция айрим фойдаланувчилар эътиборини тортиб, турли изоҳлар йиғишга ҳам улгурди. Компания раҳбари Адам Моссери ҳам уни синов тариқасида амал қилаётганини тасдиқлаган.
Моссери “Threads”даги постида “dislike”лар сони ҳаммага кўрсатилмаслиги ва сизга қолдирилган шу турдаги изоҳдан бошқалар хабардор бўлмаслигини таъкидлади. Унинг сўзларига кўра, “dislike”лар сони рейтингларда ҳисобга олинади.
Функция фойдаланувчиларга қайсидир шарҳ ёқмагани ҳақида муаллифни хабардор қилиш имконини яратади. Бу шарҳ тизимининг янада ривожланишига ёрдам бериши мумкин.
Таъкидлаш жоиз, 2021 йилда Инстаграм фойдаланувчиларга лайкларни яшириш имконини тақдим этганди. Бу ижтимоий тармоқларда одамлар ўртасидаги босимни пасайтиришга ёрдам бериши керак эди.
