ОТМ талабаларини ўқишдан четлатиш тизими ўзгариши мумкин

 

Олий таълим муассасаларида академик қарздорлиги бўлган талабаларни ўқишдан четлатиш механизмини жорий этиш таклиф қилинмоқда. Шу муносабат билан ҳукуматнинг 2020 йил 31 декабрда қабул қилинган "Олий таълим муассасаларида таълим жараёнини ташкил этиш билан боғлиқ тизимни такомиллаштириш чор-тадбирлари тўғрисида"ги 824-сонли қарорига тегишли ўзгартириш киритилиши режалаштирилмоқда.

 

Мазкур таклиф Олий таълим, фан ва инновациялар вазирлиги томонидан ишлаб чиқилган ҳукумат қарори лойиҳасида акс этган. Унга кўра, 824-сон қарор билан тасдиқланган "Олий таълим муассасаларида ўқув жараёнига кредит-модул тизимини жорий этиш тартиби тўғрисида"ги низомнинг 42-бандидан қуйидаги жумлани олиб ташлаш таклиф қилинмоқда:

 

"Семестр ва ўқув йили якуни натижаларига кўра академик қарздорлиги бор таълим олувчилар ўқишдан четлаштирилмайди."

 

Агар бу таклиф қабул қилинса, талабаларни ўқишдан четлатиш, қайта тиклаш ва курсдан курсга ўтказиш бўйича амалдаги тартиб қуйидагича бўлади:

• Агар талабанинг ГПА (ўртача баҳолари) ўтиш балидан паст бўлса, у қайта ўқишга қолдирилади.
• Академик қарздорлиги бор талаба фақат шу фанларни қайта ўзлаштириб, тегишли шартнома маблағларини тўлайди.
• Бир курсда неча марта қайта ўқиш мумкинлиги бўйича чеклов белгиланмайди.

 

Лойиҳага тегишли вазирлик ва идоралар ўз муносабатини билдирган. "Таълим соҳасидаги лойиҳалар маркази" лойиҳа офиси бу таклифга қарши чиқиб, бундай ўзгариш кредит-модул тизимининг асосий тамойилларига зид эканини таъкидлаган.

 

Мутахассисларнинг фикрига кўра, академик қарздорлик юзага келган тақдирда, талабага:

• Шу фанларни бошқа семестрда қайта топшириш,
• Ёки мазкур фан ўрнига киритилган янги модулни ўзлаштириш имконияти берилиши лозим.

 

Шу сабабли, фақат академик қарздорлик туфайли талабани ўқишдан четлатиш халқаро тажрибага ҳам мос келмайди, дейилади лойиҳа офиси баёнотида. Шу асосда ҳукуматнинг 824-сон қарори 42-бандидаги "академик қарздорлиги бор талабалар ўқишдан четлаштирилмайди" деган жумлани ўз ўрнида қолдириш таклиф этилган.

 

Мазкур норматив-ҳуқуқий ҳужжат лойиҳаси бўйича таклиф ва эътирозлар инобатга олиниб, у якуний шаклга етказилгандан сўнг қабул қилиниши мумкин.